Denboraren antolaketa Konfiantzaren Pedagogiaren ardatzetako bat da Arizmendin.

Abenduan zehar, Arizmendi Ikastolako zuzendari J. Iñaki Etxezarretak eta Berrikuntza Pedagogiaren arduradun Amaia Anterok eskola-ordutegia eta eskola–egutegia gaia izan zuten hizpide bai profesional guztiekin egindako bilera baten, eta baita guraso ordezkariekin egin zuten biltzar prestatzailean ere. Bi bilera horietan azaldu zuten eskola-ordutegiaren inguruko proposamena lantzen hasteko, kronobiologia eta kronopedagogia hartu direla erreferentziatzat, eta eskola-egutegiaren planteamendu berri bateranzko proposamena egiteko bi zientzia horiez gain, Europako hainbat herrialdetako egutegiak eta eskola-emaitzak alderatu direla. Horretaz gain, ikasturte honetan landuko den gaia izanik, lanketa-kronograma aurkeztu zuten (lan taldeen datak, guraso-foroenak, partaidetza sozialekoarenak…). Denboraren antolaketa Konfiantzaren Pedagogiaren ardatzetako bat da. Dena ondo bidean, ekaina edo uztailean erabakiak hartzeko moduan izango dira Arizmendi Ikastolan.