Agurreko hitzetan Koldo Tellituk erronkaz eta aukerez betetako legealdi baten aurrean gaudela gogoratu zuen, eta horietako batzuk aipatu zituen: konpetentzietan oinarritutako euskal curriculumren garapena, euskara ardatz duen eleaniztasun eredu berria adostea eta bultzatzea, ikastolako ikasle guztien emaitzak hobetzea, eta hezkuntza sistema egonkortasunez egituratzea. Egiteko hauek nahikoa ez, eta Madrilgo Gobernuak LOMCE aurrelegetasmoa martxan jarri izanaren arriskuak ere aipatu zituen. “Gai horietako batzuk aztertzeko berreskuratu ditugu lozorroan genituen Topaketak”, esan zuen, eta hainbat ekimenetan Hezkuntza saileko arduradunekin kolaboratzeko borondatea agertu zuen.

Cristina Uriarte sailburuak, bere aldetik, ikastoletako kideen artean eroso sentitzen zela adierazi ondoren, euskal hezkuntzan egin den bidea goraipatzekoa zela esan, eta bide horretan ikastolek egin duten lana nabarmendu zuen. “Baina ezin dugu dugunarekin konformatu”, esan zuen. Hezkuntzak gaur dituen erronka zenbait aipatu zituen; horren harira, LOMCEren aurrean irmotasuna erakusteko borondatea agertu zuen. “Amore eman gabe, buru-belarri saiatuko da Jaurlaritza hainbeste ahaleginez altxatutako gure hezkuntza sistema defendatzen”, esan zuen.